Trust Issues | Kung paano nasira ang aming muwang na isipan

1/29/2018 Juan Hapito 2 Comments

japhet on the go

Isa sa mga dahilan kung bakit hirap ako mag-tiwala basta-basta sa mga tao ay dahil sa ginawa ng tito ko sa aming dalawa ng kapatid kong si dech. Itago na lang natin ang tito ko sa pangalang Tito Vamoy. Siya ang isa sa mga taong tinitingala namin na sumira ng aming pagtitiwala. Tandang tanda ko pa kung gaano kataas ang lagnat ni Dech noon (madalas siya lagnatin dahil lampayatot siya) at dahil presko sa taas kung saan nag-aaral si Tito Vamoy ay doon muna kami nag-stay. Laging inaasar ni Tito Vamoy si Dech dahil sa nakakatawa at mala-pucca nitong itsura. Kung di mo kilala si Pucca igoogle mo. Siya yung chinese na mukhang siopao na hawig ni chinchan. Pero hindi iyon ang pang asar sa kaniya ni tito. Lagi nitong tinutukso si Dech na pango dahil kumpara sa ilong niya na parang sa bumbay ay talaga namang parang magkaaway ang dalawang pisngi ng ilong ni Dech hanggang ngayon noon. Matapos mag-aral ni tito, naisipan na niyang simulan ang pag wasak sa aming inosenteng pagiisip. Tinanong niya kami kung alam ba namin kung paano gagaling si dech agad na sinagot naman namin ng hindi. Sabi niya, kapag inamoy daw ni dech ang kaniyang daliri na hindi namin alam kung saan nanggaling ay mawawala agad ang lagnat ni dech. Dahil alam naming matalino si tito ay agad naman kaming naniwala. Inamoy ni dech ang daliri ni tito. Ilang saglit pa ay biglang humagalpak sa tawa si tito at sinabing galing sa puwet niya ang daliri. Diring-diri kami parehas ni dech sa kaniya habang siya ay hindi na magkandaugaga sa katatawa dahil sa tagumpay na prank. 

Isa pa sa mga hindi matatawarang kasamaan na ginawa sa akin ni tito ay noong minsang kumakain kami ng santol at nalunok ko ang buto. Hindi alam ng inosente kong pag-iisip kung ano ang gagawin kaya madali niyang naisakatuparan ang kaniyang maitim na binabalak. Sinabi niya sa akin na tutubo ang santol sa aking ulo hanggang sa tuluyan na akong maging isang puno. Isang buong linggo kong sinubukang ilabas ang santol. Isang linggong ginalugad ko aking tae sa toilet pero ni minsan ay hindi ko ito nakita. Isang linggo ako nagplano kung ano ang gagawin kapag nagsimula na tumubo ang mga dahon at ugat sa aking katawan. Isang linggo akong nag-mukhang tanga dahil sa kasamaan ni tito vamoy.

Simula noon, hindi na agad ako basta-basta naniniwala... 

...at hindi gumaling si dech.

2 comments:

  1. kaya ka hindi nagkakajowa kasi lolokohin ka lang nila. isang malaking prank kung magkaron ka ng jowa! 😂

    ReplyDelete
    Replies
    1. HAYUF ka! Gusto mo mawalan ng juwa? hahaha!

      Delete